ब्यवसायिक किसानका लागि अनुदान माग

    माघ १६, २०७५              प्रदेश टुडे

देउखुरी, १६ माघ । ब्यवसायिक बंगुरपालनका लागि स्थानीय सरकारले अनुदान उपलब्ध गराउनुपर्ने तालिममा सहभागी किसानले माग राखेका छन् । तालिममा सिकेर मात्र नहुने भन्दै बंगुरको खोर निर्माणका लागि मनग्य खर्च लाग्ने गरेकोले आधुनिक शैलीमा बंगुरपालन गर्न नसकेको सहभागी कृषक मनिराम थापाले बताए । त्यस्तै अर्का सहभागी रुपा चौधरीले बंगुरका लागि चाहिने दाना उत्पादन स्थानीयस्तरमै गर्नका लागि नगर पालिकाले सहयोग गर्नुपर्ने बताइन् ।
ब्यबसायिक हिसावले बंगुरपालन गर्न नसक्ने किसानलाई राज्यले पहिलो प्राथमिकतामा राखेर कार्यक्रम ल्याउनुपर्ने उनीहरुले बताए । तीनदिने ब्यवसायिक बंगुरपालन तालिम मंगलबार लमहीमा सम्पन्न भएको छ । लमही नगरपालिका पशु शाखाको आयोजनामा तीनदिने तालिम शुरु भएको थियो । तालिममा वडा नम्बर १ देखि ९ नम्बर वडासम्मका २७ जनाको सहभागिता रहेको थियो । समापन तालिममा नगरपालिकाका उपप्रमुख देवका बेलवासेले पुरानो संस्कारबाट पालिने पेशालाई अब परिवर्तन गरेर व्यवसायलाई सञ्चालन गर्नुपर्ने बताएका थिइन् । किसानले छोटो समयमा धेरै आयआर्जन गर्ने पाटो अपनाउनु पर्ने बताएकी थिइन् । त्यस्तै नगरपालिकाका प्रमुख प्रशासकीय अधिकृत गजेन्द्र बहादुर डाँगीले उत्पादकमूलक ब्यवसायी बनेर आर्थिक जीवनस्तरलाई बलियो बनाउन किसानलाई डाँगीले आग्रह गरेका छन् । समृद्घ नगरपालिका बनाउन किसानको पनि अहम् भूमिका हुने बताएका थिए । स्थानीय सरकारले गरेको लगानीको भरपुर फाइदा लिन पनि प्रमुख प्रशासकीय अधिकृत डाँगीले आग्रह गरेका छन् । तीन दिनसम्म सञ्चालन भएको तालिमको प्रशिक्षकमा पशु शाखा कार्यालय लमहीका निमित्त प्रमुख शिवराज न्यौपाने रहेका थिए । कार्यक्रमको सहजीकरण पत्रकार प्रिया स्मृती गजमेरले गरेका थिए ।