कक्षा १२ पास नगरे सेवाबाट बञ्चित

    फागुन १७, २०७५              प्रदेश टुडे

रोल्पा, १७ फागुन । रोल्पाको सुनिल स्मृति गाउँपालिकाले महत्वाकांक्षी योजना अघि सारेको छ । आफ्नो क्षेत्रको शैक्षिकस्तर सुधारका लागि भन्दै गाउँपालिकाले १२ कक्षा उत्तीर्ण नगर्ने विद्यार्थीलाई आफ्नो कार्यालयबाट प्रवाह हुने सेवाबाट वञ्चित गर्ने महत्वाकांक्षी योजना ल्याएको हो ।

गाउँपालिकाभित्र अध्ययन गर्ने हरेक विद्यार्थीले अनिवार्य रूपमा कक्षा १२ उत्तीर्ण गर्नुुपर्ने भन्दै बीचमै पढाइ छोड्ने विद्यार्थीलाई गाउँपालिकाबाट प्रदान गरिने सम्पूर्ण सेवा सुविधा कटौती गर्ने गाउँपालिकाका अध्यक्ष गुणेन्द्र घर्तीले बताए । घरको आर्थिक अवस्था कमजोर भएर पढ्न नसक्ने भए विद्यार्थीले वडा वा गाउँपालिका कार्यालयमा निवेदन दिए गाउँपालिकाले कक्षा १२ सम्म पढाउने अध्यक्ष घर्तीले बताए । गाउँपालिकाका प्रत्येक वडामा कक्षा १२ सम्मको विद्यालय सञ्चालन गर्ने तथा गाउँपालिकाभित्र एउटा क्याम्पस स्थापना गर्ने तयारी भइरहेको अध्यक्ष घर्तीले जानकारी दिए ।