क्रियाशील सदस्यको रिफाइन हुन्छः गिरी

    जेठ ११, २०७५              प्रदेश टुडे

घोराही, १० जेठ ।
नेपाली काँग्रेसका केन्द्रीय सदस्य दिपक गिरीले नेपाली काँग्रेसका क्रियाशील सदस्यहरुको रिफाइन (संशोधन) गर्नुपर्ने बताएका छन् । गाउँ–गाउँमा पार्टीका क्रियाशील सदस्यहरुको सक्रियतालाई मूल्यांकन गरेर क्रियाशील सदस्यताको संशोधन गर्नुपर्ने बताएका हुन् ।
‘पार्टीलाई बलियो बनाउनको लागि गाउँस्तरदेखि नै कार्यकर्ताहरु क्रियाशील हुनुपर्छ’ नेपाल दलित संघ जिल्ला कार्यसमितिले आयोजना गरेको समता दिवस कार्यक्रमका प्रमुख अतिथि पूर्व सिंचाई मन्त्री गिरीले भने ‘संगठन विस्तार गर्न र सुदृढ गर्नको लागि क्रियाशील सदस्यहरुलाई नै रिफाइन गर्नुपर्छ कि ?’ नेपाली काँग्रेसको नेतृत्वमा नै संविधान निर्माण भएकाले अब कार्यकर्ताहरु बस्ती–बस्तीमा पुगेर उनीहरुलाई संविधान बारेमा बुझाउनुपर्ने बताए ।
बाम एकता भएसँगै नेपाली काँग्रेस झनै बलियो भएकाले सबै कार्यकर्ताहरु एक भएर लाग्नुपर्ने बताएका थिए । काँग्रेसमा आवद्ध भएका दलित समुदायहरु सबै क्षेत्रमा सक्रिय भूमिका देखिएको बताएका थिए । नाम मात्रै दलित भएपनि राजनीतिक, सामाजिक, शिक्षा क्षेत्रमा अन्य सरह नै भूमिका रहेको बताए । नेपाली काँग्रेसका नेता तथा निवर्तमान सदस्य राजु खनालले दलित संघको क्रियाशीलता बढाउनको लागि नेपाली काँग्रेसले अझै भूमिका खेल्नु पर्ने बताएका थिए ।
नेपाली काँग्रेसले दलित समुदायको लागि संविधान निर्माण, दलित आयोगदेखि कानुनी कारवाही निर्माणको लागि उल्लेखनीय भूमिका खेले पनि जनताहरुलाई बुझाउन नसकेको बताए । नेपाली काँग्रेसका जिल्ला सभापति किर्तीबहादुर खड्काले सामाजिक तथा राजनीतिक क्षेत्रमा दलित समुदायमा धेरै परिवर्तन भएको बताएका थिए । दलित हुँ भने कमजोर मनोभाव हटाएर व्यवहारिक रुपमा लैजानको लागि सबैले सशक्त भूमिका खेल्नुपर्ने बताएका थिए । पार्टीभित्र कार्यकर्ताहरुले आफ्नो पदको जिम्मेवारी लिन नसकेको बताएका थिए । पार्टीका कार्याकर्तादेखि, क्रियाशील सदस्य, भातृ संगठनहरुले बैठक तथा अन्य कार्यक्रमहरु गर्न नसकेको बताएका थिए ।
कार्यक्रममा नेपाली काँग्रेसबाट प्रदेश सभामा उम्मेदवार उठेका भरतबहादुर न्यौपाने, कमल किशोर घिमिरे, महाधिवेशन प्रतिनिधि शंकर गिरी, दलित संघका केन्द्रीय सदस्य जोगेन्द्र विश्वकर्मा, महासमिति सदस्य चेतबहादुर शेपाईली, क्षेत्र नम्बर १ का सभापति भेषराज पाण्डे, क्षेत्र नम्बर २ का सभापति गिरिराज सुवेदी, क्षेत्र नम्बर ३ का सभापति भूपबहादुर डाँगी, नेपाली काँग्रेसका पूर्व जिल्ला सदस्य यज्ञनारायण आचार्य, दलित संघका निर्वतमान जिल्ला संयोजक खेमराज विक, दलित संघ क्षेत्र नम्बर ३ का अध्यक्ष शरद विक, क्षेत्र नम्बर २ का अध्यक्ष छविलाल सुनार, क्षेत्र नम्बर ५ का अध्यक्ष धु्रव विकलगायतले मन्तव्य राखेका थिए । उपाध्यक्ष प्रकाश नेपालीको स्वागत मन्तव्यबाट सुरु भएको कार्यक्रमको सहजीकरण मसेर नेपालीले गरेका थिए ।