रक्तदान अभिमुखीकरण

प्रदेश टुडे
घोराही, ९ साउन । दाङमा पछिल्लो समय रगतको माग बढ्दै गईरहेको र त्यसको अनुपातमा रक्तदानका कार्यक्रमहरू हुन नसकेपछि जिल्लामा रक्तदानका कार्यक्रमहरूको आयोजना गर्न स्थानीय सरकारहरू पनि अघि बढ्न थालेका छन् ।

जिल्लामा रगतको अभाव हुन नदिन घोराही उपमहानगरपालिका वडा नम्बर ११ ले बिहीबार वडा कार्यालयमा रक्तदान सम्बन्धी एकदिने अभिमुखीकरण कार्यक्रम सम्पन्न गरेको छ ।

वडा अध्यक्ष कुलबहादुर लामिछानेको अध्यक्षतामा वडाभित्र रहेका ३६ वटा टोल विकास समितिका अध्यक्ष तथा पदाधिकारीहरूको र जनप्रतिनिधिहरूको सहभागितामा नागरिकलाई रगतको महत्व, कस्तो व्यक्तिले रक्तदान गर्ने, कस्ताले नगर्ने, वर्षमा कतिपटक रक्तदान गर्ने ? लगायतका कुरामा जानकारी गराइएको थियो ।

पछिल्लो समय दाङमा रगतको माग बढ्दै गएको र त्यो अनुपातमा रक्तदानका कार्यक्रमहरू अलि कम हुँदा बेला–बेलामा जिल्लामा रगतको अभाव हुने गरेको सूचना प्राप्त गरेपछि समुदायस्तरमा पनि रगतको महत्व र रक्तदानका कार्यक्रमहरू गर्न सकिने उद्देश्यका साथ आफूहरूले रेडक्रससँग समन्वय गरेर अभिमुखीकरण कार्यक्रमको आयोजना गरेको वडा अध्यक्ष लामिछानेले सहभागीहरूलाई जानकारी दिएका थिए ।

कार्यक्रमपश्चात् साउन १६ गते नारायणपुर उपशाखासँग समन्वय गरेर रक्तदान गर्ने कार्यक्रम गर्ने कार्ययोजनासमेत तयार गरेको वडा अध्यक्ष लामिछानेले बताए ।

उक्त कार्यक्रममा रेडक्रस सोसाईटी दाङका मन्त्री प्रकाश श्रीवन्द रक्तसञ्चार केन्द्र दाङका प्रमुख दिलिप न्यौपाने र रेडक्रस सोसाईटी नारायाणपुर उपशाखाको मिनराज शर्माले कार्यक्रममा सहभागीहरूलाई प्रशिक्षण दिएका थिए ।

साउन १६ गते रक्तदानसँगै रेडक्रस नारायणपुर उपशाखाको नवनिर्मित भवनको उद्घाटन गरिने भएकोले त्यस क्षेत्रका नागरिकलाई सहभागी भईदिन पनि वडा अध्यक्ष लामिछाने र नारायणपुर उपशाखाका मिनराज शर्माले सबैलाई आग्रहसमेत गरेका थिए ।