शान्तिनगरमा विपद् पूर्व तयारी

    साउन २३, २०७५              प्रदेश टुडे

तुलसीपुर, २२ साउन ।
शान्तिनगर गाउँपालिकामा विपद्बाट हुनसक्ने सम्भावित क्षति कम गर्न पूर्व तयारी थालिएको छ । शान्तिनगर गाउँपालिकामा रहेका सम्पूर्ण वडाहरुमा वडास्तरीय विपद् व्यवस्थापन समिति गठन र परिचालन, विपद्ले क्षति पु¥याउन सक्ने स्थानको पहिचान र गाउँपालिकामा रहेका सम्पूर्ण निकाय तयारी अवस्थामा रहने निर्यायहरु गरेको छ ।
शान्तिनगर गाउँपालिकाका अध्यक्ष तथा विपद् व्यवस्थापन समितिका संयोजक कमानसिङ डाँगीको अध्यक्षतामा मंगलबार बसेको पूर्व तयारी बैठकले यस्तो निर्णय गरेको हो । उक्त अवसरमा तत्काल प्रत्येक वडाहरुमा वडास्तरीय विपद् व्यवस्थापन समिति गठन गर्ने र आवश्यक अवस्थामा परिचालन हुने निर्णय गरेको छ । त्यस्तै तत्काल वडास्तरीय विपद् व्यवस्थापन समितिले सम्भावित विपद् हुनसक्ने स्थानहरु र त्यहाँ उपलब्ध हुनसक्ने आवश्यक जनशक्तिको एकीन गरी गाँउपालिकामा पठाउने निर्णय गरेको छ । बैठकले विगत एक हप्तादेखि परिरहेको वर्षाका कारण हुनसक्ने विपद्का घटनालाई ध्यानमा राखी गाउँपालिकाभित्र रहेका जनप्रतिनिधि, राजनीतिककर्मीहरु, शिक्षक, कर्मचारी, सुरक्षाकर्मी, सरकारी एंव गैर सरकारी संघसंस्थाका प्रतिनिधिहरु तयारी अवस्थामा रहने र यो समयमा मोवाइल अफसमेत नगर्ने निर्णय गरेको छ । बैठकमा नेपाल रेडक्रस सोसाइटी पवननगर उपशाखाका सभापति विमल केसीले शान्तिनगर क्षेत्रमा हुनसक्ने विपद्का घटनालाई मध्यनजर गर्दे खोज तथा उद्धारका सामाग्रीहरु तयारी अवस्थामा राखेको र आवश्यक तालिम प्राप्त जनशक्तिसमेत तयारी अवस्थामा रहेको जानकारी गराएका थिए ।