तुलसीपुरमा ९५ प्रतिशत योजना सम्पन्न

प्रदेश टुडे
तुलसीपुर, २८ साउन । तुलसीपुर उपमहानगरपालिकाले आर्थिक वर्ष ०७६/७७ मा ९५ प्रतिशत योजना सम्पन्न गरेको छ । विभिन्न खालका ७ सय ३० योजनामा ६ सय ९१ योजना सम्पन्न गरिएको उपमहानगरले जनाएको छ । सम्पन्न हुने योजना कुल योजनाको करिब ९५ प्रतिशत रहेको नगरले जनाएको छ । ३९ योजना आर्थिक वर्षमा सम्पन्न हुन सकेका छैनन् ।

असारमा मात्रै विकास गर्ने अवधारणालाई परिवर्तन गरेर तुलसीपुरले गत आर्थिक वर्षबाट प्राथमिकता निर्धारण गरेर योजना अगाडि बढाएका कारण समयमै योजना सम्पन्न गर्न सकिएको नगर प्रवक्ता सूर्यबहादुर डाँगीले जानकारी दिए । उनले कोरोनाका कारण केही योजनाको रकमान्तरण गर्नुपरे पनि त्यसको संख्या न्यून रहेको जानकारी दिए ।

योजना शाखाका प्रमुख टेकबहादुर खड्काका अनुसार गत आर्थिक वर्षमा ४ सय ५७ वटा वडास्तरीय योजनाहरूमा ४ सय ४७ योजना सम्पन्न भएका छन् भने ३८ वटा बहुवर्षिय आयोजनामा ३७ वटा सम्पन्न भइरहेका छन् ।

निर्वाचन क्षेत्र नम्वर ३ को स्थानीय पूर्वाधार कार्यक्रम अन्तर्गत १० वटा योजनामा सबै योजनाहरू सम्पन्न भएको उनले बताए । क्षेत्र नम्वर ३ ‘क’ को पनि पाँचवटा योजनामा सबै योजनाहरू सम्पन्न भएका छन् । तुलसीपुर उपमहानगरपालिका दुबै निर्वाचन क्षेत्र अन्तर्गत पर्ने गर्दछ ।

संघीय सरकारको सशर्त अनुदान अन्तर्गत शिक्षातर्फ दशवटा भवन निर्माणका योजनाहरू भएका छन् । ती सबै योजनाहरू सम्पन्न भएको योजना शाखाले जानकारी दिएको छ । संघीय समपूरक अन्तर्गतको एउटा योजना पनि सम्पन्न भइसकेको छ ।

उपमहानगरपालिकाले सम्पन्न गरेको योजनाहरूमा सिंचाइतर्फ १ सय ३९, खानेपानीतर्फ ६१, भवनका १ सय ९९, अन्य कार्यक्रमतर्फ १ सय ६७ योजनाहरू रहेका छन् ।

यसैगरी संघीय सरकार विशेष अनुदान अन्तर्गत ४ वटामा ३ योजना, प्रदेश समपूरक अनुदानमा २ वटामा १ जना, प्रदेश सशर्त अनुदान १२ वटामा ११ वटा सम्पन्न भएका छन् । प्रदेश विशेष अनुदान २ वटामा २ वटा, पर्यटन तथा नागरिक उड्डयन मन्त्रालय अन्तर्गत २ वटा योजना, तराई मधेश समृद्धि कार्यक्रमअन्तर्गत ४ वटा योजनामा ३ वटा योजना, गरिबसँग विश्वेश्वर कार्यक्रम अन्तर्गत ३ वटा योजनामा ३ वटा सम्पन्न भएको योजना प्रमुख खड्काले जानकारी दिए ।

संघीय सरकारको कार्यक्रमअन्तर्गत ९ वटा वडामा उर्जा सोलार बत्ती जडानको काम पनि सम्पन्न भएको छ । महिला तथा बालबालिका मन्त्रालय अन्तर्गतको एउटा योजनामा सम्पन्न भइसकेको छ भने सडक बोर्डका २ वटा योजना पूरै बाँकी रहेका छन् । उपमहानगरले आर्थिक वर्ष ०७६/७७ मा २ अर्ब ४५ करोड रकम नगरमा खर्च भएको छ ।

शाखा र वडासँग समीक्षा

तुलसीपुर उपमहानगर–पालिकाले आर्थिक वर्ष ०७६/७७ को वार्षिक समीक्षा गरेको छ । उपमहानगरपालिकाका १९ वटै वडा र ३१ वटा शाखाले एक वर्षभरीमा गरेका कार्यक्रमको समीक्षा गरेका हुन् ।

समीक्षाका क्रममा कोरोना महामारीका कारण केही योजनाहरूको रकमान्तरण गर्नुपर्ने अवस्था सिर्जना भएता पनि सन्तोषजनक रूपमा सबै योजना सम्पन्न भएको जानकारी गराएका थिए ।

वडागत तहमा अधिकृत छैटौंसहित लेखा अधिकृतको समेत व्यवस्था गरिएका कारण धेरैजसो काम वडाबाटै हुने भएकाले सेवालाई थप प्रभावकारी बनाउने प्रतिवद्धता समेत व्यक्त गरिएको थियो । योजना सञ्चालनका लागि कतिपय स्थानमा उपभोक्ता समितिले ठेक्कासमेत दिने गरेकाले आशातित कामसमेत हुन नसकेको बाध्यता व्यक्त गरिएको थियो ।

‘पारदर्शी तरिकाले उपभोक्ता समितिको काम पनि हेर्नुपर्ने छ’ वडा सचिवहरूले गुनासो गरे । योजना सम्पन्न गर्नुभन्दा अगाडी उपभोक्ता समितिलाई अनिवार्यरूपमा तालिमको व्यवस्था गरिनुपर्ने आवश्यकता रहेको समीक्षा गरिएको थियो ।

वडामा सबै अधिकार प्रत्यायोजन गरिएकोले कर्मचारीहरूले विशेष ध्यान दिएर काम गर्नुपर्नेमा नगरप्रमुख घनश्याम पाण्डेले निर्देशन दिए । उनले व्यक्तिगत फाइदाका लागि भन्दा पनि करिअरका लागि काम गर्न अनुरोध गरेका थिए । ‘हामीले जनतालाई सन्तुष्ट बनाएर पठाउनुपर्दछ, जनताको खुसी नै हाम्रो व्यवसायिक धर्म हो’ नगरप्रमुख पाण्डेले भने ।

शाखाहरूको समीक्षा कार्यक्रममा पनि विभिन्न शाखाहरूले प्रगति विवरण पेश गरेका थिए । वर्ष दिनभरिमा गरेको कामहरूको विवरण राख्दै शाखा प्रमुखहरूले आगामी दिनमा थप जिम्मेवार भएर जाने प्रतिवद्धतासमेत व्यक्त गरेका थिए । स्थानीय सरकार भएका कारणले गर्दा विभिन्न ऐन र कानुन बनाएर अगाडी बढ्नुपर्ने बताए । कार्यक्रमको सहजीकरण बैठक व्यवस्थापन शाखा प्रमुख झरेन्द्र खरेलले गरेका हुन् ।