प्रदेशको योजना स्मार्ट कृषिः मन्त्री पौडेल

    भदौ ०८, २०७५              प्रदेश टुडे

तुलसीपुर, ७ भदौ । प्रदेश नम्बर ५ की भूमि व्यवस्थापन, कृषि तथा सहकारी मन्त्री आरती पौडेलले कृषिको विकास र आधुनिकीरकणका लागि सरकारले स्मार्ट कृषिको अवधारणा लिएको बताएकी छन् । उनले कृषिको विकासका लागि हरेक स्थानीय तहमा स्मार्ट कृषि कार्यक्रम लागू गरिने बताइन् । प्रदेश सरकारले बजेटमा व्यवस्था गरेर स्मार्ट कृषि कार्यक्रम अगाडि बढाइसकेकाले तत्काल लागू गरिने पौडेले बताइन् । सबै स्थानीय तहमा एक ठाउँलाई नमुना स्मार्ट कृषि कार्यक्रम लागू गरिने उनले बताइन् । कृषकहरुलाई सहुलियत ब्याजमा ऋण प्रदान गर्नका लागि विभिन्न बैकसँग पहल भइरहेको बताउँदै पौडेलले कृषकहरुलाई विभिन्न सहुलियत दिएर प्रदेश सरकारले उत्पादन वृद्धिका लागि विशेष कार्यक्रम सञ्चालन गर्ने जानकारी दिइन । तुलसीपुर उप–महानगरपालिकाले बिहीबार तुलसीपुरका गरेको अन्तरक्रिया कार्यक्रममा मन्त्री पौडेलले त्यस्तो बताएकी हुन् । मन्त्री पौडेलले खाली जग्गालाई बाँझो हुन नदिनका लागि प्रदेश सरकारले जग्गा बाँझो राख्नेसँग करारमा जग्गा लिएर किसानहरुलाई उत्पादनका लागि प्रेरित गर्ने समेत बताइन् । जमिनदारसँग जग्गा छ तर श्रम गर्ने मान्छे बेरोजगार छ यसको हामीले अन्त्य गर्न लागेका छौँ, उनले भनिन्, भारतबाट आउने विषाक्त तरकारीले नेपाली बजारलाई प्रभावित पारेको छ । काम गर्ने कृषकहरुले सहुलियतका लागि विभिन्न प्रस्तावना तयार पार्नुपर्ने वाध्यताको अन्त्य गर्ने बताइन् । कार्यक्रममा विषय प्रदेश गराउँदै तुलसीपुर उप–महानगरपालिकाका नगरप्रमुख घनश्याम पाण्डले उत्पादकत्व बढाउनका लागि उपमहानगरले कृषिलाई प्राथमिकता दिएको बताए । उनले उत्पादन बढाएर मात्रै कृषिको विकास नहुने हुँदा बजारीकरणमा पनि ध्यान दिनुपर्ने बताए । कृषिमा जनतालाई उत्प्रेरित गर्न नसकेको भन्दै अब उत्पादन बढाउन व्यवसायीहरु किसानहरुलाई विशेष सम्मान गरिने बताए । कार्यक्रममा पशुविज्ञ डा. सुन्दर बस्यालले छाडा चौपायाको समस्या सबैतिर भएको बताउँदै आधुनिक गौशाला निर्माण गरेर यसबाट फाइदा लिन सक्ने सुझाए । बालीविज्ञ सुमन खनालले कृषियन्त्र निर्माणमा प्रदेश सरकारले कार्यक्रम अगाडि बढाएको बताए । तुलसीपुरलाई कृषिको पकेट क्षेत्रका रुपमा विकास गरेर काम गर्न सकिने बताए । उपप्रमुख माया शर्माले धन्यवाद ज्ञापन गरेको कार्यक्रमको सञ्चालन सञ्चार संयोजक वसन्त आचार्यले गरेका थिए ।