स्वास्थ्य सुरक्षा मापदण्डको अनुगमन

प्रदेश टुडे
दाङ, ३१ भदौ । दाङ जिल्ला उद्योग वाणिज्य संघले बजार खुलेसँगै व्यवसायिक प्रतिष्ठानहरूमा स्वास्थ्य सुरक्षा मापदण्ड पूरा भए नभएको वारेमा अनुगमन जारी राखेको छ । संघले सोमबारदेखि बजारमा पुगेर मापदण्ड पूरा गरे नगरेको बारेमा जानकारी लिन थालेको थियो ।

व्यवसायीक प्रतिष्ठानमा स्वास्थ्य सुरक्षा मापदण्ड पूरा गरेको नगरेको बारेमा अनुगमन जारी राखेको स्वास्थ्य सुरक्षा अनुगमन समितिका संयोजक टंकसिंह बुढाथोकीले जानकारी दिए । अनुगमनका क्रममा व्यवसायीहरूले स्वास्थ्य मापदण्ड पूरा गरेको नै पाइएको उनले बताए । ‘अनुगमनका क्रममा नागरिकहरू सचेत नै रहेको पाइएका छौं’ बुढाथोकीले भने । त्यसैगरेर सचेतना सन्देश लेखिएका स्टिकर पनि टाँसिएको थियो ।

यसप्रकारको अभियानलाई निरन्तरता दिइने संयोजक बुढाथोकीले बताए । टोली मंगलबार बैंक रोड, गणेश मन्दिर रोड, भाडा लाइन, सब्जीमण्डी लगायतको स्थानमा पुगेको थियो । त्यस अवसरमा समितिका सदस्यहरू टंकप्रसाद पोख्रेल, रामप्रसाद पोख्रेल, भाडा व्यवसायी समितिका अध्यक्ष मधुसुदन अधिकारी, फेन्सी व्यवसायी समितिका अध्यक्ष एकराज खनाल, सचिव माधव खनाल, हार्डवेयर समितिका अध्यक्ष दामोदर केसी, गल्ला तथा किराना व्यवसायी समितिका विनोद पाण्डेलगायतको सहभागिता रहेको थियो ।