विद्यालय अनुगमन कडाई गरिने

    पुष ०९, २०७६              प्रदेश टुडे

सल्यान, ९ पुस । कपुरकोटका सामुदायीक विद्यालयहरूमा अनुगमनलाई कडाई गरिने भएको छ । कोर्ष पूरा नभएको, विद्यालय क्षेत्रमा फोहर बढेको तथा व्यवस्थापनको पक्ष कमजोर भएको गुनासो बढेपछि अनुगमनलाई गाउँपालिकाले कडाई गर्ने भएको हो ।

मंगलबार पारस्परिक जवाफदेहीता परियोजनाअन्तर्गत साझेदारी मञ्चको बैठकमा विद्यालयका समस्या पहिचान गरेर समाधान गर्दै लैजाने र अनुगमनलाई प्रभावकारी बनाउने निर्णय भएको परियोजनाका जिल्ला संयोजक दिपेन्द्र शाहीले बताए ।

उनका अनुसार बैठकमा उपस्थित अभिभावकहरूले कतिपय सामुदायीक विद्यालयमा शिक्षकहरू नियमित नहुँदा कोर्ष पूरा नभएको, विद्यालयका शौचालय निकै फोहर भएको, जडान गरिएको ईन्टरनेटको दुरूपयोग भएको जस्ता गुनासो गरेका थिए ।

बैठकमा गाउँपालिका अध्यक्ष भिमबहादुर सेनले वडा अध्यक्षहरू, विषयगत कार्यालयका प्रमुखहरूलाई निर्देशन दिदै पालिकाभित्र हुने हरेक गतीविधिहरूको निगरानी र अनुगमन गर्न आग्रह गरेका थिए ।

खासगरी अभिभावक र विद्यालय व्यवस्थापन समितिबाट विद्यालयको अनुगमन र शैक्षिक गुणस्तर वृद्धिमा पहल हुनुपर्ने बताउँदै सेनले जिम्मेवारी पूरा नगर्ने प्रधानाध्यापक तथा शिक्षकहरूलाई कारवाही गरिने चेतावनी दिए ।

अध्यक्ष सेनले हरेक वडाका जनप्रतिनिधिहरूलाई जिम्मेवारी बाँडफाँड गरिदिएर शिक्षा, कृषि, स्वास्थ्यलगायतका क्षेत्रको अनुगमन गर्ने व्यवस्था तत्काल मिलाउन वडा अध्यक्षहरूलाई निर्देशन गरे ।

कार्यक्रममा गाउँपालिका उपाध्यक्ष तिला बुढा मगरले गाउँपालिकाको विकासमा सबैको हातेमालो आवश्यक रहेकोमा जोड दिइन् ।

साझेदारी मञ्चको बैठकमा पारस्परिक जवाफदेहीता परियोजना र यसले हालसम्म गरेका क्रियाकलापहरूको समीक्षा गरिएको थियो । यस्तै पशु बिमाको महत्व किसानलाई बुझाउने र यो कार्यक्रमलाई छिट्टै कार्यान्वयनमा लैजाने निर्णय पनि मञ्चले गरेको छ ।